Lesergedicht: Gratis und umsunst

Brauchst du an Test vo PCR

Aft mach dih gfasst af a Malehr

In Internet suachst grea und blau

Weil aus da Web-Seit wirst ned schlau

Drum foahrst oafach zua Awategn

De is fia so an Fall a Segn

Doh vor da Tüa da wartn scho

Zwoahundert Leut – du kimmst ned dran „

A Teststraß gibt’s im Nachbarort“

Verrat dir wer – des is a Wort!

Wirst’ dort bist is de Tüa vasperrt

Da wird dir s´Testn ah vawehrt

„Mir ham Corona“ steht da gschrübm

„De nexte Teststraß de gibt’s drübm

Im Nachbarort, ned weit vo da“

Scho sitzt im Auto und foahrst o

Hiatzt bist vo deine Sorgn dalest

Du sitzt scho da und machst dein Test

Nimmt doh de Gschicht nu a guats End?

Nu schnell desinfizierst da d’ Händ

S Ergebnis wird – is gar koa Frag –

afs Handy gschickt am nextn Tag

Du wartst scho gspannt – da Tag vergeht

Da zweite ah – hiatzt wird’s da zbled

Doh wo wüllst du dih denn beschwern

Am Salzamt wird dih koana hern

Am drittn Tag – d´Zeit lauft scho o

Is d’ SMS-Nachricht aft da:

„Ergebnis negativ“ – was soills

Ih brauch a neichs und wiederhoils

Ah wannst da aus der Haut foahrn kunnst:

Da Test woar gratis und umsunst