Ein Gedicht zum Tunnel von Weyer

Da Tunnel von Weyer (Keine Sage)

In Weyer, stöllt´s eich des nur vor,

treibt ma in Berg an Tunnel vor!

Den Moaktplatz wü ma hoid umfoahrn

und dort uns den Verkehr erspoarn.

Ma bohrt jetzt scho, des soidst nid glaubm,

i geh von Zeit zu Zeit mal schaun.

Und wirklich siacht ma da a Lucka.

I tua ma d´Händ auf d´Augn oft drucka,

weil i oft glaub, des is a Traum,

aber na, se tan da wirklich baun!

Wer hätt vor a paar Jahr des glaubt, dass des was wird,

seit Joahrn da Buagamoasta mit´n Dechant diskutiert.

Da Klaffner hat gsagt, da wirst nu schaun,

in Dechant jedoch hat gfehlt da Glaubm.

Niemois baun´s da in Wey´ a Loch,

nau und jetzt schau, jetzt baun si´s doch!

A wenig skeptisch san jedoch de Leit de meistn,

waun da Tunnel fertig is, kinan mir uns daun des Autofoahrn nu leistn?

Fois nid, is a nid viel verhaut,

daun wird da Tunnel ois Fußgängerzone umgebaut.

Oder fiarn Wochamoakt gaunz klass,

waun´s regnet, wird da drinnen niemand nass,

waun´s hoaß is draussn wia nid gscheit,

im kühlen Tunnel verbringst de Zeit,

oder beim Marktfest, wo´s ja meistens regnet,

wa ma im Tunnel mit Trockenheit gesegnet.

Doch jetzt wird er amoi gebaut,

dass ruhig wird aum Marktplatz und nid goar so laut.

Wer woaß, wozu da Tunnel dient

Und was nu ois zum Vorschein kimmt,

weil a da Biber hat sich nix denkt,

hat a Loch boart und hat uns dadurch des Goldene Märktl gschenkt.

Sunst warad da heite nu a Teich,

beinah´ im Zentrum von Österreich.

Zum Schluss tua i nu schnell was sagn,

zu de Leit, de den Tunnel grabm.

Mia Weyrer wünschen eich viel Glück, dass nix passiert,

so dass des a unfallfreie Tunnelbaustö wird.

Mehr lesen: Erster Tunnel der Umfahrung Weyer ist fertig