Lesergedicht: D'Impfung

D“Impfung

Angfangt hat alls im 2020 er Jahr,

dö Pandemie hat a uns dawischt sogar,

d´Leut ham Angst kriagt zwegn dem neuchen

Seuchenvirus, dem kannst frei nöt ausweichn.

Einschränkungen sand kema na da Reih

und Heut sperrns dö Leut nu ei.

Da Hausarrest nennt si Quarantäne,

d´Gschäfta, Wirtshäusa zua, i z´druck a Träne.

Alle hams g´schimpft und g´jammert: „A Impfung muaß her,

sunst wird allwei graßa dös Malheur !

D´Regierung hat d´Schuld und wo bleibt dö EU ?

Ja sapperment schlafen dä in Brüssl allweil nu !“

Nach an guaten Jahr voll Leiden,

wo ma muaß jede G´sellschaft meiden,

gibt“s endli an Impfstoff, aba nu nöt gnua,

alle keman zan Impfen nu nöt dazua.

Da hert ma dö allerbesten Sachen,

va Leut dös i fast in´d Hosen machen.

„Dös Serum mag i nöt weil für Leut üba sechzg Jahr

solls schädli sei, ja tödlich gar.

Und dös van Chinesen o mei o mei,

da pflanzen´s dir gar an Chip mit ei,

da kinans di total übawacha

du kannst dö nöt wehrn, du kannst nix macha.

Van Russen, der Spritzn kannst a nöt vatraun,

dö toan dös vü z´schnell aussahaun,

nöt gscheit erprobt und schlampad g´macht,

dös hat schan vü ins Unglick bracht.

Und dö unzfriedenen Leut

dö wern nu afghußt wia nöt gscheit.

Da tuat oana nu richti antaua,

Kickerl hoaßt er und is a Blaua.

Organisiert Demos für Unzfriedene und Radikale,

dazua nu blaue Rabauken dö liabn a dö Randale.

Da geht“s dann zua af da Strass und gegen d´ Polizei

weil lustig is so a Massenraffarei.

Da Kickl halt a schene Red,

halt alle Leut anscheinend für bled,

hußt den Mob nu richti af,

die guaten Leut dö zahln dann draf.

Zu guata Lötzt stellt er si als Messias dar,

als Retter vor Regierungswillkür und Impfpflicht gar.

Aba an Messias ham ma schan,

a wenig an Kurzen, da Kickl kimmt nu nöt dran.

Ös war halt schen wanns mögli war,

a Impfung gegn Dummheit wunderbar.

Aba dös wird a Wunschtraum bleiben,

mia miassen nu länger unter dö Dummen leiden.

Gott sei Dank laft hiatzt dös Impfen richti an

gegen dö Pandemie, alle dö wolln keman nu dran.

Hoffentlich lassen si recht vü impfen

für a normals Leben und nöt zan Schimpfn.

Dann wird a dö Schreia dö Basis entzogn,

und es wird a nimma so vü g´logn,

üba weltvernichtungs Theorien und Gedanken

dö si um dö Pandemie hiatzt ranken.

Weil mit Schimpfen und Randaliern

kannst übahaupt garnix kuriern.

Es wird nix bessa wird nix guat

wann ma netta mäutern tuat.

Ernst Fischer sen., Oberkappel