Lesergedicht: Corona 3

Mia san iazt scho im 3. Joahr,

de Pandemie is nu net goar.

Es hüft koa wedan und koa streik`n,

damit konnst das nur mehr vabreit`n

Es bringt nix, wonn ma Leit kutschiert,

van Ländle bis noch Wean zomfiat,

tuat durchanond donn Zuckal schlecka,

do frogst di scho, hom de an Pecka?

Inzwischn hom de Leit a gmerkt,

des Wurmmitt`l is do vakehrt

und trotzdem nimmt ma, des mocht Sinn,

weida, die Dr. Kickl Medizin.

Nochdenga derfst do jo net,

hob leida net studiert, bin bled,

drum ko i so fü net veasteh`n,

doch wiat`s fü Leit, net andas geh.

I glaub nu an den Hausvastond,

der jo bekonnt in unsan Lond,

der sogt das 2+2 soi vier ergeb`n,

wonnst sexi moast, dann liegst daneb`n.

Gemeinsom wa des scho zan richt`n,

doch heart ma täglich neichi  Gschicht`n,

und oiwei peckt ma hin und her,

gemeinsom geht hoit goar nix mehr.

Mia san iatzt scho in an Dilemma

und schwa is do zan aussakemma,

gewaltbereit san monche  Leit,

doch aufanond haun, is net gscheit.

Es hüft des Impf`n , des is gwis,

a s`Mask`n trogn, i net vagieß,

i wosch ma d`Hend , a ohne Treg

und trotzdem geht des Zeig net weg.

Doch ewig wird a des net dauern,

doch muas i scho sog`n mit bedauern,

dass ma ogeht oiwei mehr,

des Abstand hoid´n, des foit ma schwer,

Net Händ geb´n derf`n zuwa drucka,

in Wirtshaus net in Tisch varucka,

tonzn, singa, Kecksal pocha,

net feiern und gemeinsom locha.

Des Oiss muas woart`n nu a Zeit,

doch donn mochst Leb`n uns wieda Freid,

gemeinsam Oissi,  mocha derf´n,

is guat fias Herz und a fiat Nerv`n.

I wünsch eich, dass des boid passiert,

und Püchö wieda explodiert,

koa Festl wern ma donn vasama,

doch daweu mias ma nu trama.